Acts 16

Timouti kako Poulɨ'nji Sailasɨ'nji umentohofofoho.

1Poul ango Ntepe'nji Lisɨtɨla'nji sopone'no umentisofoho. Ango Lisɨtɨla sopo hwe fihwo Jisasɨmo inɨngkawowo'nɨngkiso sohwo humunyoponoho. Kakoe yofe Timoutiyoho. Timoutiye kona'wohisi Juta apefoho. A'musi Jisasɨmo inɨngkawowo'nɨngkisiyoho. Timoutiye kanɨngkwohwo a'amu Ngkɨlik nta'ango hweho. 2A'amu Jisasɨmo inɨngkawowo'nɨngkohofo Lisɨtɨlanta'ango so'nji Aikouniyam mta'ango so'nji hofɨko Timoutimne'no ole ulɨmentohofi, Hwe wopɨngo hweho. 3Poul ole syafɨhu'mento, Ngko Timouti'nji wehwantae hwo'nyoho. Ose syafɨsyonto kako a'amu Jutafe yahino a'apaho sɨhu kolo'nyoso Timoutimo uloho'mentisofoho. Hwapɨngoso ole, A'amu Jutaso ango hopo sopo humamotofoso hofɨko huno moi'wonoho. Timoutiye kanɨngkwohwo a'amu Juta hwo'maho. O'o Ngkɨliknta'ango hweho. Oso'no kakoe hwomufe a'apaho sɨhu makolofe'njo imentohofofoho. 4Ango ho'mo so'meemo Poulɨyo Timoutiyo Sailasɨyo hofɨko nowentɨfi oso hungkuno a'amuapousel sohwanji hwe engo Jelusalem mta'ango sohwanji mtito'mentohofo so'no lutɨhwamentohofofoho. Ole ulɨmentohofi, Olo hungkuno hiloso tɨfi finɨngkamno. 5Oseso a'amu Jisasɨmo inɨngkawowo'nɨngkohofofe sɨmeho hi'ntnnonoso yokumpohn'nyo engo imo'nɨmentisofoho. A'amu Jisasɨmo inɨngkawowo'nɨngkohofoso pi'nɨngo engo imo'nɨmentohofofoho.

Poul ango Tɨlouas sopo wojo hopa uhwonɨmentisofoho.

6Nowentɨfi hwaho Fɨlijiya'nji Ngkolesiya sopo emoyontanɨngkofi Anɨtuye Towahuno ulɨmento, Sekwo hwaho Esiya sopo Anɨtuye hungkuno nolutɨhwafɨkutoho. 7Hofɨko Misiya hwaho momɨngo sopo nowentɨfi Mpitiniya hwaho sopo wohwano lontɨfi ko imentohofoso, Jisasɨye Towahuno hano pitofahumentisofoho. 8Oso'no hofɨko Misiya uhwontawentɨfi Tɨlouas ango sopo i'mofamentohofofoho. 9Oso hopo sopo sɨkwo'miyo somo Poul wojo hopa uhwonɨmentisoso hwe Masetouniyanta'ango sohwo nolohofonto Poulɨmo jomo ulɨmento, Mijo lopo nowekohopohoji fonefo'maho. 10Ose uhwonɨngkahonɨngki, nakwo, ngko Luk ntnne'no Masetouniyamne'no yo'mayo ito'no esyohumamentɨhwonefoho. Nakwo huno moi'wonoho. Anɨtu ole nalɨmento, Sekwo nje hungkuno Masetouniya motakuji a'amu somo filutɨhwamno. Ose nalɨmentisofoho.

A'mu Litiya kako Anɨtuye a'amu ne imo'nɨmentisofoho.

11Oseso nakwo ango Tɨlouasnta'ango yofayokino nomentani nowekentani Samoutɨlas i'mofɨwentani mo'nɨngkanta Neyapolis i'mofamentɨhwonefoho. 12Oso ango sopo ulɨko'mentani honɨngkanomo nowentani Filipai i'mofamentɨhwonefoho. Oso ango hopo sopo hwaho Masetouniya sofe ango engo ponoho. A'amu Loum mta'ango hwaho mokosyohumayo sohwa osopo humamentohofofoho. Sɨkuno fehohnjo oso ango sopo humamentɨhwonefoho. 13Sɨkuno iyoho humayo somo nakwo kusomo noswopontani mitɨmomɨngo sopo nakwo huno ole syafɨhu'mentɨhwone, A'amu Juta olopo Anɨtumne'no jomo ujo'no uhu'mokumotofofoho. Osopo uhwonɨmentɨhwoneso moya'mi sofa nofosyohumentanɨngkofi uhwonontani nakwo nujwokohumentani hofɨko'nji hungkuno lɨmentɨhwonefoho. 14A'mu fisi kakoe yofe Litiya ango Taiyotaila nta'angiyoho. Kako ho'yo fae miyo'nohino syoho'njiyoho. Oso a'musi kako Anɨtumo jomo ulɨmojiyoho. Kako nohumanto Poulɨye hungkuno upa'nɨmentisofoho. Anɨtu a'musiye huno yɨwolo'mokahonɨngki kako Poulɨye hungkuno yokumpohn'nyo upa'nɨmentisofoho. 15Nupa'nɨngkahonɨngki oso a'musi kakoe angomo humamotofo so'njimo nakwo mijo kiyoma'mentɨhwonefoho. Nokiyomahonɨngkuhwoni a'mu hisi nalɨmento, Ngko Anɨtu ne'no sɨmeho hi'ntnnono nehopi syanɨfɨsyɨkujɨ'manji sekwo nje angomo nopɨkuji fosyohumamno. Oso hungkunoso yokumpohn'nyo nelahonɨngki kakoe angomo humentɨhwonefoho.

A'amu Filipai sohwa hofɨko Poulɨ'nji Sailasɨ'njimo impo'angomo uhumatɨ'mentohofofoho.

16Sɨkuno fihwi nakwo Anɨtumo jomo ujo'ne sopono nowentanɨngkuhwoni, a'mu siki syoho ulohofiyosi nakumo honɨngkanopo ne'ma'mentisofoho. Oso a'mu hisi towahuno wonyo'njosi nohumanto hungkuno yo'mayo hwangku imo'nyo'neso lɨmojiyoho. Oso hungkuno lɨmojo so'no hofiyakwosa hamniyoho engo ma'mentohofofoho. 17Oso a'mu hisi Poulɨ'nji nakwo'nji nonenɨngkawento a'amu somo ulɨwo'nɨmento, Olo hwe lohwa Anɨtuye syoho ulohofiyo hwafoho. Anɨtu nakumo asomo nemayo so'no wolosetɨhwantɨfeho. 18Sɨkuno huhwo huhwi a'musi kako oso yahino ose yɨwo'nɨngkiso so'no Poul sɨmeho wonyo umo'nɨngkahonɨngki ikinjamo lohofonto towahuno wonyo sohumo ulɨmento, Jisas Kɨlaisɨye yofe wakilɨmne'no yohono. Oso a'mu simo nulɨko'mahoji mpano. Ose ulahonɨngki towahuno wonyo sohwo kunto'no ulɨko'ma'mentisofoho.

19Ulɨko'ma'mentisoso a'musiye hofiyakwosa olo hiloso uhwonɨmentohofoso hofɨkoe hamniyoho hwapɨngoso ulɨko'ma'mentisoso uhwonontɨfi Poulɨ'nji Sailasɨ'nji aho yokumpohn'nyo kentɨfi a'amu uhu'mokiyo sopo hwe engo sohwamne'no husɨmpemotawomentohofofoho. 20Hwe engo Loum mta'ango hungkuno ito'no melɨhwajiyo'njo sohumo u'mantɨfi ulɨmentohofi, Olo hwe lohwa'u Juta hwa'uyoho. Nakwoe ango wonyo imokiyo'ne pisiyo hwa'uyoho. 21Hiko honɨngkano nom'ne songo netɨhwalokusiyoso nakwo Loum honɨngkano'njo sohwona'niye hungkuno hohontajo somo mtɨhupeelofoho. Honɨngkano songoso minɨngkowanehwono. 22Ose ulahonɨngkofi a'amu hopi'nono nupa'nontɨfi hwe sohwa'umo mango engo ulɨmentohofofoho. Hwe hungkuno melɨhwajiyo'njo sohwa Poulɨ'nji Sailasɨ'nji hikoe hwapɨfe mtɨhupeemofontɨfi a'amumo ulɨmentohofi, Sohwe'nji fongkupmno. 23Nofonjantɨfi impo'angomo uhumatɨ'mentohofofoho. Uhumatɨ'mentohofoso hwe impo'angomjo mokosyohumayo sohumo ulɨmentohofi, Kɨko hikimo yokumpohn'nyo mokosyohumaho. 24Hwe huhwo sohwo hungkuno yokumpohn'nyo upa'nonto oseso ango ne ajwomo'mo nomotasonto sikoe sɨfe iyomo intofahumentisofoho.

25Kuntaliyopo Poulɨ'nji Sailasɨ'nji impo'angomo nohumanji Anɨtumo isamoyoka ulonji ta lontanɨngki a'amu impo'angomjo sohwa upa'nɨmentohofofoho. 26Hohosohonta hwomɨhwo mɨkunɨmposo yahonɨngki impo'angomjo hwosaho yomo yomo yonto hoku'yo hopi'nono hwosompeefahonɨngki ahwomo nano hofɨkoe sɨfe ahomjo itolo'meehumentisofoho. 27Hwe impo'angomjo mokosyohumayo sohwo nolɨkafonto uhwonɨmentisoso hoku'yo hopi'nono nohwosompo'nowo'mɨwentanɨngki uhwononto huno ole syafɨhu'mento, Impe'njo sohwa hofɨko hiyae nto humpehofo lonto kakoe sɨhu nomanto kakimo wojwotofahinɨmonto imentisofoho. 28I oso'no Poul joho mohm'no ulɨmento Kɨko wonyo imokintoho. Nakwo hopi'nonohino sohwona'ni humalohwono. 29Ose ulahonɨngki hwe impo'angomjo mokosyohumayo sohwo sikiloho'no joho ulonto, hano kunto kunto'no wento humentisofoho. Noswonto yomo engo yonto Poulɨ'nji Sailasɨ'njiye sɨfe ki'nyo'mo pɨwahu'mentisofoho.

30Poulɨ'nji Sailasɨ'njimo mempo hohnta'ni ipemotoswaponto ulɨmento, Hiko hwe engo sohwahusi, Anɨtu nɨfo'mayo'ne pipi imnehono. 31Ose ulahonɨngki ulɨmentisi, Kɨko Jisasɨmne'no sɨmeho hi'ntnnono uyo'manji Mpohwo Anɨtu asomo nokumanefoho. Kakoe a'amu ne imo'ntnne hwosoho. Jɨje mehomi'nji ape'nji osenohinoho. 32Ose ulonji hwe huhwo sohumo kakoe ango humamotofo so'njimo Anɨtuye hungkuno lutɨhwamentisiyefoho. 33Hohosohonta hwe huhwo sohwo Poulɨ'nji Sailasɨ'njiye uyomo mijo yatɨku'mentisofoho. Yatɨjwahonɨngki oso hwe sohwo kakoe a'amu'njimo Jisasɨmne'no mijo kiyoma'mentisiyefoho. 34Hwe impo'angomjo mokosyohumayo sohwo Poulɨ'nji Sailasɨ'njimo kakoe angomo ipemotasonto wopayo umentisofoho. Oso hwe huhwo sohwo kakoe mehomi intohwantnne'no Anɨtumne'no sɨmeho hi'ntnnono uyoso'ne sɨmeho wopɨngo umo'nɨmentisofoho. 35Iyoho longkonɨngkahonɨngki hwe engo Loumnta'ango sohwa hofɨko hwe itokuso'njo sohwamo lɨhwojahonɨngkofi hofɨko hwe impo'angomjo mokosyohumayo sohumo ulɨmento, Oso hwe hufa'u sohwa'umo sɨkwatɨpo filohofo.

36Ose ulahonɨngkofi hwe huhwo sohwo Poulɨmo hungkuno ulɨmento Hwe engo Loum mta'ango sohwa wosesɨkwojantɨfe'no hungkuno lɨhwajohofo. Oso'no siko impo'ango mta'ni ulɨko'mahosɨsi sɨmeho pompenjiyo'nji fɨwanɨnyo. 37Ose ulahonɨngki Poul kako hwe itokuso'njo sohwamo ulɨmento, O'o oso yahino wopɨngo'maho. Nekwo Loum a'amu hwoya'yoho. Fosi nekwo wonyo miyo'njo yahonɨngkuhwoi sekwo wonyo elohofontɨfi utɨhwa'nyopo ikujoho efongku'malofofoho. Hungkuno ito'no melɨhwajiyo'njo miyontɨfi impo'angomo siki intofo ehumalofɨhwasoho. I olohonta elohofo, Siko hiyae hano uhusɨsi fɨwanɨnyo. Oso yahino nɨhu'no wonyofoho. Hwe engo Loum mta'ango sohwa nekumne'no nopɨkuji mempo hohnta'ni ipemotewahonɨngkuji nekwo wohwantayoho. 38Ose ulahonɨngki a'amu itokuso'njo sohwa oso hungkuno hiso motowahonɨngkofi hwe engo Loum mta'ango sohwa nupa'nontɨfi Poulɨ'nji Sailasɨ'nji Loum a'amu sohwa'une'no iyoho unɨmentisofoho. 39Oso'no hwe engo sohwa impo'angomne'no nowentɨfi Poulɨ'nji Sailasɨ'njimo sɨmeho wopɨngo umo'nyo'ne'entɨfi ulontɨfi mempo hnta'ni ipemotaswontɨfi ulɨmentofofi, Siko olo ango lopo ulɨko'mahosɨsi mpannyo. 40Ose ulahonɨngkofi Poulɨ'nji Sailasɨ'nji impo'angomo ulɨko'manji Litiyafe angomo humentisiyefoho. Osopo a'amu Jisasɨmo inɨngkowawo'nɨngkohofo so'nji nuhu'mokontɨfi hungkuno sɨmehomo'mo nusosofitofonji ulɨko'ma'mentisiyefoho.